عذرا آذری
بیرلشمیش میللت‌لر تشکیلاتی‌نین
تعریفینه گؤره قادین‌لارا قارشی زوراکیلیق، قادین‌لاردا
فیزیزکسل، جینسل و روحسال ضررلره سبب اولا بیلن هر بیر داورانیشا شامیل اولور. بو
ایصطیلاح ب م ت-ده ایلک اولا‌راق،
1993-جو ایلین نویابر آییندا مطرح اولدو و “ قادین‌لارا قارشی زوراکی‌لیغی آرا‌دان
قالدیرما” عونوانیندا بیر بیلدیرگه حاضرلانا‌راق، ب م ت-نین عمومی ایجلاسیندا
تصویب اولدو کی، ایران دا اونو قبول ائدیب و ایمضالاییب. بیلدیرگه ایله یاناشی،
همچنین 25 نویابر (5 آذر) گونو میرابئل باجی‌لاری خاطره‌سینه کی، دومینیکئن اؤلکه‌سینده
دیکتاتورلوقلا موباریزه اوچون جان‌لارینی فدا ائدیب‌لر، سیمبولیک اولا‌راق “قادین‌لارا
قارشی زوراکیلیق علیهینه بئین الخالق موباریزه گونو” کیمی قئیده آلیندی.
“قادین‌لارا
قارشی زوراکیلیق”، اونلاری سادهجه دؤیمک ویا اؤلدورمک دئییل. بلکه چوخ گئنیش و
موختلیف بویوت‌لار و فورم‌لاردان عبارت‌دیر. میثال اولا‌راق قادینی حده‌لمک،
ایجتیماع و هابئله ائو ایچینده زورلا آزادلیغینی قیسیتلاماق، قیز اوشاق‌لاری اوچون
ائولنمک یاشینی آزالتماق، مجبوری حالدا حجاب و باش اؤرتوسو زوراکیلیق ساییلماقدا‌دیر.
عینی حالدا، قادین‌لارین بعضی ساحه‌لرده ایشلمک‌لرینی یاساقلاماق، یاشاییش یئرینی
سئچمکده سربست اولماماق‌لاری و حتی مجبوری شکیلده سفر اوچون آتا یاخود ارلریندن
ایزین گرک‌لی‌لیگی ده زوراکیلیق داییره‌سینده یئرلشیر. او توپلوم‌لاردا کی ائولی
کیشی‌لره نئچه آروادلی‌لیق ویا موقت ایزدیواج بیر حاق کیمی قبول ائدیلیر، ار بیر
طرف‌لی اولا‌راق بوشاما حاقینا صاحیبدیر و اوشاق‌لارین قییوم‌لوغو تکجه آتایا
وئریلیر، قادین دایمی اولا‌راق ایسترئس و روحسال چتین‌لیک‌لرله باش-باشا اولور.
قادین‌لارا یؤنه‌لیک آشاغیلاما و هر بیر کلمه کی قادینین بدنی ویا شعورونو لاغا
قویماق هدفی ایله دئییلیر، زوراکیلیغین دیگر میصداقی‌دیر. بو نؤع زوراکی‌لیق‌لار
موختلیف ایجتیماعی موحیط‌لرده، عائله اورتامی، ایش یئری، مکتب‌لر و داها آشکار و
پلان‌لی شکیلده قادین‌لاری آلیب-ساتماقدا و اونلاری فاحیشه‌لییه مجبور ائتمکده
اؤزونو گؤستریر. همچینین ساواش زامانی ویا اؤلکه‌لر آراسی موناقیشه‌ده قادین‌لارا
تجاووز و جینسل ایستیفاده ده زوراکیلیق دئمکدیر.
2012-11-24 11:47:29
http://www.yurd.net/ از یوردنت
No comments:
Post a Comment